Yaxın günlərdə Laçının Sus kəndinə bir neçə
ailə köçürüləcək.
Qaçqınların və Məcburi Köçkünlərin İşləri üzrə Dövlət Komitəsindən verilən xəbərə görə, doğma yurda qayıtmağa
hazırlaşan ailələr arasında artıq püşkatma da keçirilib.
Mərasimdə Qaçqınların
və Məcburi Köçkünlərin İşləri üzrə Dövlət Komitəsinin rəhbər şəxsləri, Şərqi Zəngəzur
iqtisadi rayonuna daxil olan Laçın rayonunda Azərbaycan Prezidentinin xüsusi
nümayəndəliyinin, Laçın Rayon İcra Hakimiyyətinin və Dövlət Komitəsi yanında
İctimai Şuranın nümayəndələri iştirak ediblər.
Qeyd edək ki, Sus
kəndində inşası başa çatdırılmış fərdi evlər hazırda müvəqqəti məskunlaşma yerlərində
yaşayan və Sus kəndində daimi qeydiyyatda olan məcburi köçkün ailələrə veriləcək.
59 ailə arasında
keçirilən püşkatmanın qaydaları ailə tərkibinə uyğun olaraq müəyyən edilib.
Doğma yurdlarına
qayıdacaq bu ailələrdən 13-ü ikiotaqlı, 28-i üçotaqlı, 14-ü dördotaqlı, 4-ü isə
beşotaqlı fərdi evlə təmin ediləcək.
Öz kəndlərinə qayıtmağın
sevincini bölüşən kənd sakinləri işğaldan azad olunmuş ərazilərdə yaradılan şəraitə
və onlara göstərilən qayğıya görə Prezident İlham Əliyevə və Birinci
vitse-prezident Mehriban xanım Əliyevaya minnətdarlıq edib.
Ailələrin yaxın
günlərdə Sus kəndinə yola salınması nəzərdə tutulur.