Əmək və Əhalinin
Sosial Müdafəsi Nazirliyinin tabeliyindəki Dövlət Məşğulluq Agentliyi Laçın
rayonunda Azərbaycan Respublikası Prezidentinin xüsusi nümayəndəliyinin dəstəyi
ilə Laçın şəhərində “Laçında peşə öyrən!” adlı yarmarka keçirib.
Yarmarka Laçın şəhərini
iki hissəyə bölən Həkəri çayının sahilində açıq havada təşkil olunub. Laçın şəhəri
və rayonun Zabux kəndinin sakinlərinə Laçında fəaliyyət göstərən 15-ə yaxın işəgötürən
tərəfindən 40-dan çox peşə istiqaməti üzrə iş təklif olunub, həmçinin iştirakçılara
master-klaslar keçirilib. Tədbirdə Laçın rayonunda Azərbaycan Respublikası
Prezidentinin xüsusi nümayəndəliyini bu qurumun rəsmisi
Hüseyn Quliyev, Dövlət Məşğulluq
Agentliyini isə Agentliyin İdarə Heyəti sədr müavini Ülvi Abasquliyev təmsil
edib. İşəgötürənlər və tədris müəssisələrinin nümayəndələri də yarmarkada
yaxından iştirak edib.